বিশ্বশিল্পী - জ্যোতিপ্ৰসাদ আগৰৱালা

শিল্পী মই তিনিও কালৰ

অতীতৰ

বৰ্ত্তমানৰ

অনাগত ভৱিষ্যতৰ |

আদিতেই যাত্ৰা কৰি অনাদিলে’ যাওঁ,

ধ্বংসৰ মাজেদি মই

ৰূপান্তৰেদি ৰূপ পাই

নৱতম সৃষ্টিৰ শলিতা জ্বলাওঁ |

জনতাৰ হৃদয়ত মোৰ সোনোৱালী দেশ

মই পিন্ধো বিশ্ববেশ

নতুন দৃষ্টিৰে চাঁও সৃষ্টি অনিমেষ |

নানা ভাষা

নানা আশা

নানা জাতি-বৰ্ণ জিনি

মই শুনো ৰিনি ৰিণি

বিশ্ব – জনতাৰ এক অপুৰ্ব্ব সঙ্গীত |

সেই সঙ্গীতৰ প্ৰতিধ্বনি

তোলোঁ মোৰ

গানে সুৰ

সাম্যৰ

সমৃদ্ধিৰ

সৌন্দৰ্য্যৰ

মহামহত্বৰ

পাতিবলে’ শান্তিৰ নৱলোক

এই পৃথিবীত |

মোৰ কল্পনা – মেধা , বুদ্ধি-মনীষাৰে

মোকে কৰি সংস্কৃতিৰ অপূৰ্ব্ব আধাৰ

মোকে শলিতা কৰি জ্বলাওঁ

বিশ্ব – চাকি

বিশ্ব-জনতা পূজাৰ ;

সেই পূজাৰ প্ৰধান অৰ্ঘ্য কৰি

মই দিওঁ উপহাৰ

মোকে কৰি ষোড়শোপচাৰ |

বিশ্ব জুৰি জনতাৰ জয়জয়কাৰ

হওক জয়জয়কাৰ |