তেজৰ কোৰ্হাল
কোনোবা নিজানত বহি মোৰ হেঁপাহ পলুৱাই কান্দিবৰ মন গৈছে
জীয়াজুৰিৰ ফট্ফটীয়া নিজান পানীয়ে ধুৱাই দিবহি মোৰ শুকান দুচকু
শিল হৈ যোৱা জলকা-বুকুত গজিব ভালপোৱাৰ একোজোপা গোলাপ
পাহে পাহে গান আৰু তেজৰ কোৰ্হাল ....
একোচিৰা ধানৰ দৰে
ধানদোৱা শেষ হ'ল
তোৰ ঘিলাচকলীয়া মুঠিত একোচিৰা ধানৰ দৰে
বিৰিঙি উঠিছে তেজ
নিঠৰুৱা নৰাবোৰ
এথানি-এবানি হৈ ৰ'দ কাঁচলিত পৰি আছে
জিৰাণিৰ সিপাৰে মাৰ গ'ল বেলি -
নিজাৰ পৰিল পথাৰ
নিজান পথাৰখনত
এটা দুৰণিবটীয়া গানে লাহে লাহে পাহি মেলি দিছে
জাৰমালতী ফুলৰ দৰে
ৰমক্জমক্ ।
বিহু-বাকৰিৰ গান
আজি ৰাতিপুৱাৰে পৰা
আকাশখনে পোহাৰিচুপতি কৰি আছে ।
পিঠিয়ে পিঠিয়ে লাগি থকা ল'ৰামতীয়া ডাৱৰবোৰ
বৰষুণ দিওঁ-দিওঁ কৰি দূৰলৈ উৰি গৈছে ।
মোৰ ভৰা ভোগদৈ বাঢ়ে ফেনে-ফোটোকাৰে ।
হৈয়াঙে-দৈয়াঙে থাউনি নোহোৱা বাঢ়নি পানীৰ সোঁত
খুন্দ খাই থকা ডাৱৰৰ সিপাৰে
কি বিজুলিয়াই অ'সৰুমাই কিনো বিজুলীয়াই যায় ...
ৰ'দে বতাহে শুকাই টান টনটন মোৰ কলিজাৰ ভঙা গান ।
ধানৰ চকাছন্দা সুৰৰ ৰৈ-ৰমলী
তোৰ ম'হৰজীয়া ৰোৱনী হাতৰ টিপত সেমেকে
মোৰ পৰালি পৰা এমুঠি শুকান ধান
উচ্পিচ্ ভৰিৰ সৰুগাঁঠিলৈকে তোৰ
তলসুঁতিয়া মাটিৰ ভুৰ্ভুৰীয়া বোকা
ৰোৱা ৰ'লে এইবাৰ পথাৰ উজাৰি ধান হ'ব -
চকু-মন জুৰাই নিব ৰ'দৰ তোলনীয়া ধানে ....
হাবি-বিহু
পাত সৰাল দিয়া গছৰ ডালে ডালে আকৌ নতুন পাত ঠুটিয়াইছে
কোনোবাই ক'ৰবাত অকলশৰে দীঘল দীঘলকৈ বিহু বিনাইছে -
খোপাতে গেজেংফুল ...
বুঢ়াচাপৰ মাৰি ফুলপানীছিগাৰ ঢুলীয়া আলিমূৰলৈ জাকেৰে ওলাই আহিছে ।
বনে বিৰিখে পখিয়াপখি কৰি ডেও দি থকা হেঁটুলুকা, পাতসীয়া, বাঢ়ৈটোকা
ৰং-বিৰঙৰ গাওঁফুৰা এই চৰাইবোৰ
ঢোলৰ মাত শুনি ভুৰুংকৈ উৰি থিতাতে কোনেবাখিনি পালেগৈ ।
হাবিৰ ওপৰে চ'তিয়াচ'তি কৰি চৌফালে বনাই ফুৰিছে
চিকুন-কুমলীয়া চৰাইৰ জাকৰুৱা মাত ।
জাকপাতি চৰি ফুৰা ডাৱৰবোৰ
ওহাৰ নমাই বনৰীয়া ম'হজাকৰ দৰে ডাৱৰবোৰ
জাকপাতি আকাশত চৰি ফুৰিছে
এতিয়াই গা-মুৰি দি যেন কলহে কলহে পানীৰে তিয়াই দিবহি
ৰোৱনী পথাৰৰ ৰ'দ পিছলি পৰা বহল পিঠি -
তিতি বুৰি একাকাৰ হ'ব চপৰা-চপৰে
পথৰুৱা শুকান মাটি আৰু মোৰ
আওপুৰণি নাঙলৰ ইচাট্-বিচাট্ তীখাৰ গধুৰ ফাল ....
No comments:
Post a Comment