Bedanar jui -Poems of Ram Gogoi : বেদনাৰ জুই - ৰাম গগৈৰ কবিতা

 পৰাজিত সমস্ত ইচ্ছাৰ প্ৰতিটো মুহূৰ্ত
আৰু অনাচ্ছাদিত ফলৰ গন্ধ,
সকলো হেৰাই যায় । অস্তিত্বৰ বিলোপ ঘটে ।
অস্তিত্বৰ বিলোপ ঘটে ।
অস্তিত্বৰ গহীন গুহাত ।

গভীৰৰ পৰা আৰু গভীৰ
তেজ, অস্থি আৰু মজ্জাৰ মাজত
উত্তেজনা আৰু আৰ্তনাদ একাকাৰ হৈ
বুকুৰ মাজত তোলে হাহাকাৰ ।
                            মনৰ মাজত জুই ।
                            চৰাইৰ পাখিত জুই । ফাগুনৰ জুই ।
পৰাজিত সমস্ত ইচ্ছাৰ প্ৰতিটো মুহূৰ্ত
ৰহস্যৰ অন্তৰালত গোপন হৈ ৰৈ যায়
আত্মদহনত নিগৃহীত নিপীড়িত
কত ৰূপ কথাৰ নায়ক, ভীৰু জৰাসন্ধ ।
                             বুকুৰ ওপৰৰ পৰা কিদৰে নমাম
                             পাষাণৰ বোজা ।
অতল দুখৰ মাজতো মণি-কাঞ্চণৰ সন্ধান বিচাৰি
অভিযাত্ৰী কত মানুহ
                             স্বপ্নময় মানুহ
                             স্বপ্নময়ী মানুহ
অতল দুখৰ মাজত কেতিয়া হেৰাই যায়
সেই মানুহ , পৰাজিত সমস্ত ইচ্ছাৰ
প্ৰতিটো মুহূৰ্তৰ দৰে  ।
                             বুকুৰ মাজত হাহাকাৰ ।
                             মনৰ মাজত জুই
                             চৰাইৰ পাখিত জুই । বেদনাৰ জুই