মই ভবা কথাবোৰ
তুমি যদি ভাবিলাহেঁতেন
মই জনা কথাবোৰ
তুমি যদি জানিলহেঁতেন
মই জানো - নৈ কিয় বৈ যায়
সাগৰৰ অভিমুখে
তোমাৰ হৃদয় কিয় কল্লোলিনী
কত ঢৌ উঠে
আৰু
উঠি মাৰ যায়
মই জানো
প্ৰদীপৰ শিখা কিয় জ্বলে
আকাশ ধিয়াই
তোমাৰ হৃদয়ে
নিজেই নিজতে দহি
কাৰ বাবে প্ৰাৰ্থনা জনায় ।
মই জানো
বৰ্ষণমুখৰ ৰাতি
গছৰ ডালত পাতৰ আঁৰত
ৰৈ ৰৈ কিয় কান্দে
অজান বিহগী
সেই মাজ নিশা
কিয় কঁপি উঠে
বাৰে বাৰে
তোমাৰ চম্পাৱতী মন
তোমাৰ হৃদয় - কোমল গান্ধাৰ
মন যে নদীৰ মোহনা
মই ভব্ব কথাবোৰ
তুমি যদি ভাবিলাহেঁতেন
No comments:
Post a Comment