Bishnu Rabha - Poems of Ram Gogoi : বিষ্ণু ৰাভা - ৰাম গগৈৰ কবিতা

পৰ্বত জংগম আৰু নদী আৰু মৃত্তিকাৰ স'তে
তোমাৰ পৰিচয়, কিজানি বহুত দিনৰ ।
অসমৰ আদিমতম সমৰ যাত্ৰাত, বহু দান
অৱদান দিলা, সভ্যতাৰ স্তৰে স্তৰে । জনজাতি
অসমৰ আদিম মানুহ । (আদিম সাম্যবাদ, আৰু
যুগে যুগে তুমি তাৰ অনুবাদ । তোমাক প্ৰণাম )

আৰু আজি সভ্যতাৰ নতুন ভ্ৰমণ কাহিনী
তুমি লিখিব খুজিছা ।

শিল্পী তুমি, চেতনাৰ প্ৰভাতী ধ্বনিৰ তুমি প্ৰতিধ্বনি,
কৃষ্টিৰ সাধনা কৃচ্ছ্ৰ নিঃস্ব কৰি নিজকেই
'মুক্তি দেউল' সাজি
নিস্পেষিত কোটি কোটি বোবা চেতনাক তুলিছা জগায় ।
তোমাৰ বুকুত আছে সৃষ্টি মহিমা -
খ্যাতি আৰু গৰিমাৰ সস্তীয়া বজাৰখন
আবৰ্জনা আৰু গলিত কুষ্ঠাৰে ভৰা ।
                                 তুমি তাক জানা ।

সভ্যতা আৰু সংঘাতৰ মাহাসমৰত তুমি অসমৰ
মহান বিপ্লৱী । অত্যাচাৰ আৰু শতিকা বিয়পা
শোষণ আৰু পুঞ্জীভূত নিৰ্যাতনৰ তুমি দুৰ্ঘোৰ প্ৰতিবাদ ।
তুমি সভ্যতাৰ ফালে ।
মুক্তি-সংগ্ৰামৰ পাতনি নতুন ।
খেতিয়ক বনুৱাৰ হাড়ে হাড়ে মৃত্যুৰ কঁপনি ।
দুঃস্থ জীৱনৰ ইতিহাস তুমি ৰচি যাবা
নতুন ছন্দত ঃ অভিনৱ শব্দ চয়নেৰে ৰঙা ইতিহাস ।
বিপ্লৱী ... সভ্যতাৰ শ্ৰেষ্ঠ শিল্পী ... আৰু
                                সহকৰ্মীৰ দৃঢ় পদক্ষেপ
আৰু পাহাড় তলীত তুমি বিপ্লৱৰ তুঁহ জুই
ৰাখিছা জ্বলাই মানুহৰ প্ৰাণে প্ৰাণ

তুমি ভয়ৰ কাৰণ হোৱা । হবাতো নিশ্চয় ।
                                        সিহঁতে নুবুজে তোমাক ।

ৰুগ্ন নগ্ন এই সভ্যতাক জীয়াই ৰাখিব খোজে,
সিহঁতৰ পদে পদে মৃত্যুৰ চক্ৰান্ত ।
বাধা দিব খোজে, সৃষ্টিক, নতুন সৃষ্টিক ।
মানুহক অন্ধকাৰ
পুৰাতন গৰ্ভত আবদ্ধ কৰি, সিহঁতে ওপৰত
সাজিব খোজে পুঁজিৰ পাহৰ ।
(সেই দেখি তুমি বন্ধু;
মুক্তি দেউল সাজা....।)
তুমি আজি কাৰাৰূদ্ধ,
আৰু তোমাৰ দৰে বহুতো শিল্পী ।
যুগৰ শ্ৰেষ্ঠ শিল্পী ।
কিয়নো তোমালোক মুক্ত মহাজীৱনৰ সংগ্ৰামী
আৰু আমি অমুক্ত,
(লৌহ-শৃঙ্খল আমাৰ হাতত) ।
ৰুদ্ধ কাৰামুক্ত কৰি আমি আগুৱাই যাম ।
নতুন অসম আৰু নতুন সমাজৰ
যাত্ৰা হ'ব জয়
তুমি লিখিবা    ৰঙা ইতিহাস ।