Dinantat - Poems of Ram Gogoi দিনান্তত - ৰাম গগৈৰ কবিতা

অঘৰী কালৰ ৰথৰ আৰোহী, দিনমণি,
লাজৰ ওৰণি টানি, আজিলৈ মাগিছে মেলানি
জ্যোতি-স্নান পসচিমৰ দিগবলয়ত গান গাই
ৰঙা মেঘে , বেদনাৰে বিদায়ৰ গান
এন্ধাৰৰ আগমনি চাই ।

গৃহমুখী বিহংগৰ পাখিৰ শব্দ শুনি
হেজাৰ দিনৰ স্বপ্ন মোৰ ভাগি গ'ল ।
খন্তেক পাছতে,
সন্ধ্যাৰ আৰতি-দীপ জ্বলি শেষ হ'ব ।
শেষ হ'ল মছজিদত আজানৰ ধ্বনি;
হঠাৎ শুনিছোঁ মই আত্মাৰ কৰুণ গান;
মৃত-কল্প জীৱনত মৃত্যুৰ নীৰৱ আহ্বান ।
(শেষ হ'ল এটা দিন অলেখ স্বপ্নেৰে ৰঞ্জিত
মৰণে মাতিছে অনুক্ষণ,
জীৱনৰ অংক এটি কমি গ'ল ; আয়ুস কালৰ ।

এন্ধাৰ আহিছে নামি ,
আকাশত এটি দুটি তৰা     হাজাৰ বিজাৰ
হঠাৎ আহিলে তৰা এটি
পৃথিৱীৰ বুকুলে ।
হে কক্ষচ্যুত জ্যোতিকণা, শুনি যোৱা
দিনান্তত
বেদনা বিহ্বল মোৰ জীৱনৰ
স্বপ্নভঙা গান ।