হৃদয়, হে হৃদয় মোৰ,
কঠিনৰ পৰা হোৱা কঠিনতৰ ।
সমুখৰ পথ কণ্টকাকীৰ্ণ ,
চকুৰ পানীৰে জীৱনক আৰু
নকৰিবা অসুন্দৰ ।
কিয়নো,
অগ্ৰজ জনৰ তেজেৰে আমাৰ
পৰিক্ৰমাৰ ইতিহাস হ' ল লিখা;
এইবাৰ হ' ব শেষবাৰ
শত্ৰুৰ স'তে নিষ্ঠুৰ মোকাবিলা ।
হৃদয়, হে হৃদয় মোৰ,
পাষাণৰ পৰা হোৱা পাষাণ,
জীৱন, হে জীৱন মোৰ
দূৰ কৰা যত ৰিক্ততা আৰু
বঞ্চনাৰ অপমান ।
কিয়নো,
ৰঙা সূৰুযৰ হেঙুলী শিখাই
শতেক যুগৰ অন্ধকাৰৰ
ভ্ৰান্তি কৰিছে দূৰ,
দুৰ্বাৰ গতি আগুৱাই ব'লা
গোৱা নতুনৰ বিশ্ববিজয়ী গান,
দীপ্তকণ্ঠ কৌটি মানুহ আগুৱান, আগুৱান ।
জীৱন, হে জীৱন মোৰ,
উত্তৰ কালৰ মহাজীৱনৰ
সূৰ্য সাধনাৰ বাবে
মাতি আনা আজি বজ্ৰ ধুমুহা
প্ৰলয়ৰ ঘন ঘোৰ;
সাজু হোৱা, আজি হোৱা মৃত্যুৰে মহীয়ান,
সুন্দৰৰ পৰা হোৱা সুন্দৰতম ।
কঠিনৰ পৰা হোৱা কঠিনতম ।
No comments:
Post a Comment