Jantranaa - poems of Ram Gogoi : যন্ত্ৰণা - ৰাম গগৈৰ কবিতা

যন্ত্ৰণা ঃ এতিয়া যন্ত্ৰণাই যে জীৱন ।
জীৱনৰ অন্য নাম যন্ত্ৰণা ।

মোৰ কলিজাত, তোমাৰ কামিহাড়ত,
মোৰ নিৰন্ন বন্ধু আৰু সকলো সহকৰ্মীৰ
বুকুত তেজত, ধমনীত যন্ত্ৰণা  ।

ফুলৰ পাপৰিত, শিশুৰ হাঁহিত যন্ত্ৰণা ।

যন্ত্ৰণাৰ মানে নুসুধিবা । এতিয়া
মত অমতৰ প্ৰশ্ন নাই ।
প্ৰশ্ন মাথোঁ জীৱনৰ জীয়াই থকাৰ ।

আৰু
জীয়াই থকাৰ বাবেই
যন্ত্ৰণাক সাৱটি লোৱা দুহাতেৰে,
অধিকতৰ যন্ত্ৰণা
আঘাতৰ বিৰুদ্ধে দিয়া প্ৰ্ত্যাঘাত ।
এতিয়া, যন্ত্ৰণাই যে জীৱন ।
জীৱনৰ অন্য নাম যন্ত্ৰণা ।